· 21 oktyabr 2018-ci il tarixində Sumqayıt şəhər Gənclər və İdman Baş İdarəsi və Azərbaycan Milli Karate Federasiyası (AMKF) Sumqayıt şəhər şöbəsinin birgə təşkilatçılığı ilə “Azərbaycan Xalq Cümhuriyyəti”nin yaranmasının 100 illik yubileyinə həsr edilmiş uşaq, yeniyetmə və gənclər arasında şəhər birinciliyi keçirilmişdir.
Paralimpiya İdman Kompleksində yarışın açılış mərasimində şəhər Gənclər və İdman Baş İdarəsinin rəis əvəzi Mübariz Bəşirov, AMKF-in prezidenti Yaşar Bəşirov, vitse prezident Rəhman Hətəmov və federasiyanın Baş katibi Mirhəsən Seyidov çıxış edərək bildirdilər ki, Ümummilli liderimiz Heydər Əliyevin Azərbaycana rəhbərlik etdiyi bütün dövrlərdə kütləvi bədən tərbiyəsi və idmanın inkişafına xüsusi diqqət yetirildiyini, bu sahənin dövlət siyasətinin prioritetlərindən birinə çevrildiyini və yüksəlişinin əsası qoyularaq Müstəqil Azərbaycanın həm də idman ölkəsi kimi beynəlxalq aləmdə tanınması və Olimpiya hərəkatına qoşulmasının geniş vüsət almasını qeyd etdilər.
Natiqlər ölkəmizdə idmanın sürətli inkişafından danışaraq Azərbaycan Respublikasının Prezidenti cənab İlham Əliyevin apardığı məqsədyönlü işlərin, uğurlu idman siyasətinin nəticəsində Azərbaycanın bütün bölgələrində möhtəşəm idman sarayları və olimpiya komplekslərinin tikildiyini, ölkəmizin hərtərəfli və dinamik inkişafı, ictimai-siyasi sabitlik, mühüm beynəlxalq tədbirlərin keçirilməsində əldə olunan geniş təcrübə, müasir idman infrastrukturunun yaradılması, beynəlxalq yarışlarda əldə etdiyi uğurlardan, karate idman növünün 2020-ci ildə Yaponiyanın paytaxtı Tokioda Yay Olimpiya Oyunlarında idmançılarımızın ölkəmizi layiqincə təmsil edəcəklərindən bəhs edərək, sonda bütün yarış iştirakçılarına uğurlar arzu etmişlər.
Azərbaycan Respublikası Milli Karate Federasiyası tərəfindən Mübariz Bəşirov plaket, Rüfət Mahmudzadə isə III Dan qara kəmər ustası sertifikatı ilə təltif olunmuşdur.
Gərgin və maraqlı idman mübarizəsi şəraitində keçən birincilikdə Nihad Məmmədzadə (kata), Aysun Şahbazova (30 kq), Nizami Məmmədzadə (30 kq), Elmir Zeynalov (35 kq), Ayxan Ağamirzəyev (40 kq), Səməd Salahlı (40 kq), Aysu Əliyeva (42 kq), Aslan Dostuyev (45 kq), Niman Nuriyev (45 kq), Nadir Məmmədov (+45 kq), Bəylər Hacızadə (50 kq), Nicat Kərimli (52 kq), Ülviyyə Həsənova (53 kq), Rəvan İsmayılzadə (55 kq), Ayxan Bəkirli (55 kq), İbrahim Cəfərzadə (+55 kq), Mansur Mirzəyev (57 kq), Elnar Mahmudov (61 kq), Nicat Əsədov (63 kq), Hacıəli Vəlizadə (70 kq) və Rza Rzazadə (76 kq) bütün rəqiblərinə qalib gələrək fəxri kürsünün ən yüksək pilləsinə qalxmışlar.
Birinciliyin qalib və mükafatçıları Baş İdarənin Fəxri fərman, medal və kubokları ilə mükafatlandırılmışlar.
Media və İctimaiyyətlə İşlər katibi Sənan Məhərrəmov
